سنوات ليست من العمر

سنوات ليست من العمر

                       الفصل الثامن عشر

مرت ثلاثه ايام ولم يظهر خالد كان الأصدقاء قلقين عليه وعلى والده ويفكرون كيف يمكنهم الأطمئنان وليس لديهم عنوان او تليفون فاقترح  طارق

نسأل سلامه   

سلامه التانى على الدفعه

ايوه

واشمعنى سلامه

ده جاره فى المدينه فى الأوضه اللى جنبه

مش ده الجدع الخجول اللى  من سينا

وصباح الخير يا سينا رسيت فى مارسينا تعالى لحضنا الدفى ضمينا وخدينا يا سينا

مجدى ازيك

الحمد لله مين اللى من سينا

سلامه عاوزين نساله على خالد

طيب وماله ياله

لا ماهو مابيكلمش بنات

انا شوفت بنات مابيكلموش ولاد لكن العكس جديده دى

ياريت تستغرب فى السكه

فى السكه لفين بالظبط

تروح انت وطارق تسالوه و تسألوا بالمره على عنوان خالد فى شئون الطلبه  رباب ازى نسيتها

رباب مين

قريبه خالد بلدياته انا هروح اسالها وانتوا روحوا لسلامه وجيبوا العنوان ونرجع هنا تانى

استنى انا هجى معاك

وانا كمان ولا مفيش داعى نروح احنا التلاته

ليه فيها ايه

طيب   

كانت رباب تقف فى مقر اسره الأمل ترتدى فستان اسود فأدركوا ان والد خالد توفى واكدت لهم رباب ان خالد فى حاله صعبه لانه كان مرتبط بوالده جدا اكثر من كل اخوته و عرف طارق و مجدى العنوان و اخبرهم سلامه انه سافر مع خالد البلد بمجرد سماع الخبر وحضر معه الدفن والعزاء وانه سيعود قريبا وان لم يعد حتى يوم الخميس سيذهب اليه اجتمع الأصدقاء وامسك طارق ورقه ليكتب تلغراف عزاء وقال

اكتب ايه

نشاطركم الأحزان

دى قديمه اوى

هو العزا كمان فى قديم وجديد يا حنان

ايوه اكتبوا للفقيد الرحمه وللأسره الصبر والسلوان

طيب ما نروح بدل التلغراف

ازى يا مجدى الساعه داخله على واحده هنروح امتى ونرجع امتى

طيب نبعت التلغراف النهارده ونروح بكره الصبح

هند نروح ازى

انا وانت وحنان نروح مع رباب ومجدى وطارق يروحوا مع سلامه

بس سامى مايتضايقش

ماعتقدش وممكن هو كمان يوصلنا بدل المواصلات

صباح الخير 

اهلا يا احمد

طيب افرضى كانت مش فاضيه هنحرجها

ممكن طيب نعمل ايه

تيجى معانا يا احمد

فين

نعزى خالد

اجى طبعا هو ساكن فين

فى الفيوم

الفيوم طيب احنا ممكن لكن انتوا فكروا شويه دى بلد فلاحين

طيب وماله هو عايش لوجده مش فيه والدته واخواته البنات

ايوه بس ممكن والدته واخواته مايتقبلوش حاجه كده ويبقى شكلكم وحش

مش عارفه  

طيب خلينا فى حاجه حاجه هنكتب اسم مين فى التلغراف

اسمينا كلنا

هو ده معقول خليه بأسم طارق مش هو اللى هيبعته

هأكتب طارق وزملائك المخلصين

كويس بس بلاش المخلصين

سلام عليكم

و عليكم خالد

البقيه فى حياتك

حياتكم الباقيه

احنا عرفنا من شويه بس و كنا هنبعتلك تلغراف

كنا بنرتب علشان نجيلك البلد الصبح

كأنكم جيتوا ربنا يخليكم ليا لكن عرفتوا منين  

سألنا سلامه ورباب

الحقيقه سلامه وقف معايا وقفه بجد انا مش عارف من غيره كنت عملت ايه ولا روحت ازى

كتر خيره اهل سينا طيبين اوى

لكن انت مش كنت تقعد كمان شويه

اعمل ايه يا حنان الكل قال لى محاضراتك  وبصراحه انا مش قادر اقعد هناك من غيره

بس مامتك اكيد محتاجالك

ماهى مش لوحدها اخواتى كلهم معاها

وبعدين هى محتاجه انه ينجح كمان و خلاص الامتحان على الأبواب

المحاضرات انا هجبهالك بكره

سلامه كتر خيره كتبها لى على كربون قال لى فى التليفون

هو فيه فى المدينه تليفون

ايوه بس بفلوس زى تليفون الكليه كده

يعنى ممكن حد يطلبك هناك

طبعا ممكن  امال كلمونى من البلد ازى

حولوا المكالمه على الأوضه

لا بعتوا الفراش نادانى اتكلمت من تحت

تليفون فى الاوض ليه هو ساكن فى المدينه ولا فى هيلتون

والله وحشتنا يا خالد

الله يخليك

مش فيه محاضره دلوقتى

ايوه طيب مش هنحضر

هنحضر طبعا

حضر الجميع المحاضره وبعدها ذهبوا الى الكافيتريا ماعدا شرين التى انتظرت سامى واخبرته بوفاه والد خالد فذهب ليعزيه فى الكافيتريا وبقى معهم حتى الساعه الخامسه  و فى الأيام التاليه خفف الأصدقاء عن خالد كثيرا وحرصوا على الحضور حتى اخر يوم فى المحاضرات واقترح طارق ان يذهب الى البلد فى اجازه المذاكره ولكن هند وشرين وحنان اقنعوا خالد ان بقاءه مع سلامه افضل وان عليه ان يحقق لوالده ما كان يرجوه منه مادام اخوته  مقيمين مع والدته اما شرين فلم تستطيع رؤيه سامى خلال اسابيع الأجازه ولكنها كانت تحادثه تليفولنيا وحتى فى ايام الأمتحان كان يحضر بعد الأمتحان للأطمئنان عليها ومرت  الأمتحانات عاديه الا ان جابر عباس جاء قبل بدايه اخر امتحان وسلم على هند  وسألها عن اخبار الأمتحانات ثم قال

تتضايقى لو اسلم عليك واطمن من وقت للتانى

وانا ايه اللى هيضايقتى

طيب واصحابك

مالهم

يمكن يتضايقوا لو وقفت معاهم

انت فى بينك وبين حد فيهم مشاكل

لا ابدا

خلاص هيتضايقوا ليه

طيب اساليهم وردى على بعد ما نخلص امتحان

من غير ما أسال ماحدش هيتضايق

عايزك تتأكدى ان عمرى ماهضايقك ولو مش عاوزانى اسلم عليك قولى

ما دام الموضوع هيبقى فى حدود العادى هتضايق ليه

متشكر

ناقشت هند ماحدث مع شرين وحنان فقط وكانت حنان ترى

 الأمر عادى وليه نرفض انه يسلم  او حتى يقف معنا  هو هيعملنا ايه

لا بس ده جر رجل يعنى سلام فكلام فموعد

ايه اللى بتقوليه ده يا شيرى هى الحكايه بالعافيه

انا مش مرتاحه

ولا انا بس ماكنش ممكن اقول له مش عايزه اسلم عليك ولا اكلمك

مش مرتاحين من ايه انتوا هتجننونى

انت ماتعرفيش جابر

على كل حال الأجازه جايه وهو هينسى

جابر مابينساش

ايوه والكلامه ده معناه ان فى دماغه تخطيط للسنه الجايه

تخطيط ايه

مش عارفه طبعا

انا شايفه ان دى اوهام

ماعتقدش اكيد فى دماغه حاجه

احنا ممكن نحسسه ان ملوش مكان بينا

هو عارف كده

عارف وبيتنح

حاجه زى كده

يبقى فى حاجه غلط

ياسلام  

مش انا شفت تهاتى وحماده امبارح فى الشارع

دى اول مره بعد المشكله اللى  حصلت بينك وبينها

ايوه وعملت ايه

سلمت على فسلمت عليها واخدتها بالحضن وكلمتها كويس جدا وكأن مفيش حاجه حصلت

سامحتيها

ابقى كدابه لو قلت كده بس بصراحه حبيت احرق دمه

واتحرق

طبعا يا ماما ده ولع

عرفت ازى

كان باين مع انه اساسا وشه جامد كأنه لابس ماسك بلاستك بس برضه  احمر واخضر وبقى الوان

يا خساره كان نفسى اشوف فيه المسلسل

هو نفسه مسلسل بس بايخ

طيب وهو سلمت عليه

سلمت عليه بس ببرود وغلاسه

وليه كل ده

علشان يحس ان اللى عمله ملوش قيمه وانها هتفضل صاحبتى

ماعملتيش كده ليه قبل كده

ماكنتش قادره

حاولى تسامحيها بجد

بحاول بس مش علشان هى تستاهل لكن علشان هو ندل

لو ماكنيش بتحبيها ماكنتيش سألت

بحبها طبعا هى دى عشره يوم دى سنين ولعلمك انا لو ماكنتش بحبها ماكنتش زعلت ولا فرقت معايا

عندك حق بس انسى

ياريت يا هند مش هاقدر  انا عارفه نفسى الا اذا

اذا ايه

اذا سابته

ورجعت لأمجد

مش مهم المهم ترتبط براجل محترم

مين الرجل المحترم ده سامى

وسامى راجل محترم طبعا بس احنا بنتكلم عموما

عملت ايه فى الأمتحان يا ماهر

مش بطال

وانتوا الحمد لله

هتيجوا يوم النتيجه

لو كنت فى مصر

انت مسافره  فين

هشترى هدوم الصيف من باريس زى كل سنه

هى باريس تطول

ربنا يخليك يا ماهر

كده برضه بتتريقى

اعملك ايه يا اشرف هروح فين يعنى

اسكندريه

ايوه خالتى و ولادها شبطننين فى اروح اقضى الصيف معاهم

انت مش بتحبى اسكندريه

بحبها اوى بس معاهم مش هخرج

ليه هنخرج بأيه خالتى  مابتعرفش تسوق

وهى المواصلات  خلصت

لا بس معاها اطفال ماينفعش

خلاص ماتروحيش

هتزعل وممكن ماتروحش

لا وعلى ايه روحى

ما انا خايفه لان خالتى مش بتحب تروح البحر والعيال كل يوم هيبقوا عاوزين ينزلوا ويتفسحوا حكايه اننا معناش رجاله مش حلوه

علشان تعرفوا قيمتنا

عارفين بس هنعمل ايه ماحدش فاضى

يعنى شرين مش جايه وهند

يمكن اسافر البلد مش عارفه

انا هاجى ان شاء الله

يارب تكون اجازه سعيده

يارب خلاص احتفالا بالأجازه مجدى يغنى لنا حاجه فريحى كده

زى ايه

اى حاجه تيجى على بالك

الشمس الجريئه والنسمه الرقيقه والموجه الشقيه فى بحور اسكندريه وحشانه ياحبيبى  

ياعم هتخلينا نروح نجيب الشمسيه و الجروف والجردل

انت لسه بتلعب بالجروف والرشاشه والجردل والحاجات دى يا اشرف

هاعمل ايه غير كده على البلاج

عوم او اتفرج على البحر العب ركت اى حاجه

جرى ايه يا طارق ماتسيبه يعمل اللى على مزاجه هو على البحر كمان

انا راضيه بالجردل وجروف بس اروح البحر

خلاص تعالى معايا ياحنون

اجى اعمل ايه ان كنت بتقولى مفيش خروج

يمكن لما تيجى نعرف نخرج

بالعكس خالتك هتقلق اكتر كمل يا مجدى خلينا نغنى شويه قبل مانروح  

الشمس الجريئه والنسمه الرقيقه ..........................