عقلاء فى زمن  الجنون

 

اسرعت سميره لتفتح الباب والجرس لا يكف عن الرنين فوجدت شقيقتها عايده  التى دخلت بسرعه وقالت

البسى بسرعه وياله بينا

على فين فيه حد جرى له حاجه

جوزك

مصطفى جرى له ايه

جرى له اللى كنت حاسه بيه وكنت مش مصدقه احساسك هيتجوز الليله

طيب اهدى كده واقعدى

اقعد اعمل ايه اتحركى بسرعه

استهدى بالله وصلى على النبى الأول

حاضر عليه الصلاه والسلام

عايزانى اعمل ايه

تروحى له فى بيت العروسه  انا اتفقت مع الولاد نتقابل هنا وزمانهم على وصول علشان نروح مع بعض

ولادى انا

طبعا مش لازم يقفوا جنبك

انت اتجننتى ازاى تقولى للولاد فى حاجه زى دى انت اكيد جرى فى عقلك حاجه

انا   الحق على انى زعلانه علشانك  انا ماشيه

عايده  انت هتعملى زى العيال بقى وتغضبى

عموما انا مقدره اللى انت فيه لكن  ولادك كانوا عارفين وكمان هما اللى اتصلوا بيه مش انا اللى قلت لهم

عرفوا منين

زى انا ماعرفت واحده كلمتهم على الموبايل

اه    كده واضحت   تعالى نعمل فنجالين قهوه

ايه البرود اللى انت فيه ده  ما هو يا انا اتجننت يا انت اتجننت

انت طبعا اتجننت  وعايزه تجننينى معاك

يعنى مش هتعملى حاجه

اعمل ايه

تتصرفى

حلو اوى ازاى   

تروحى تطربقى الدنيا على دماغه

وبعدين هستفيد ايه لما اطربق الدنيا

ترتاحى تتفشى فيه تنتقمى منه

ليه انتقم منه واحد ومش بيحبنى هو بالعافيه

انت بتقولى ايه انتوا اتجوزتوا عن حب  اربع سنين طوال عراض وخطوبه سنتين و يجى عشرين سنه متجوزين وولادكم رجاله ما شاء الله  وبعد ده كله يروح يتجوز

اسمعى يا عايده انا مستحيل اقدر اعيش مع واحد مش عايزنى

يعنى هتنهزمى قدمها وتسبيه لوحده تانيه تخطفه

تخطف ايه هو شقه هنتخانق عليها ده بنى ادم له اراده وحر يحب يتجوز يطلق حقه

ايه دور الست امينه اللى انت عايشه فيه ده اتارى مصطفى سى السيد وانا مش عارفه

ايه الأفلام القديمه اللى انت بتتكلمى عنها دى

ده انا

طبعا افهمينى انا لازم احافظ على كرمتى

كرمتك هتبقى لبانه فى بق كل واحده لو حضرته اتجوز

لا مش ممكن مصطفى يجرح كرمتى حتى لو اتجوز

انت هتجننينى ماهو جوازه جرح لكرمتك

لا جوازه مش هيجرح كرمتى لكن لو جوازه تم بفضيحه ده هيجرح كرامتى

مش فاهمه ممكن تشرحى وجهه نظرك الغريبه دى

مش فاهمه ايه

يعنى هتسيبيه يتجوز

ما يتجوز  هنا مش سجن

سجن ايه ده بيته

كويس ما هو يا يبقى راجل فى بيته والكل يحترمه ويحترم  حريته يا اما كل واحد يروح لحاله وهو ما يلزمنيش

انت واعيه انت بتقولى ايه

طبعا

انت اكيد حصل فى مخك  حاجه سميره  ممكن تخلصينى وتقولى لى  هتعملى ايه

هعمل قهوه وارجع اقعد فى اليلكونه اسمع عبد الوهاب

لا اسمحى لى انا لولا انى متأكده انك بتحبى جوزك كنت افتكرت انك

انى ايه

مفيش داعى خلينا فى المهم

ايه هو المهم 

مش  هتروحى  خلاص فهمت دى  هتتصرفى ازاى

مش هعمل حاجه

عادى كده

لا  لو قاللى هضطر أطلب الطلاق

ولو ما قالش ها أصبر لما يقول وضرورى هيقولى

وليه مش هتوجهيه وتخلاصى

المواجهه يعنى مشاكل وخناق وصورتنا تتهز قدام ولادنا وممكن كل اللى بنيته طول عمرى يتهد  

و هو كان عمل حسابهم

هما مالهم وماله افرضى انه زهق من حياته معاى كرهنى

مصطفى يكرهك معقول دى

سبحانه مقلب القلوب مش حقه

لا طبعا

ليه هو الجواز ده استعباد بيعه وشاروه

انت شاربه حاجه يا سميره

هو انا عمرى شربت ولا الحاجات دى بتدخل بيتى

مش قصدى انا اسفه متزعلش منى انا قصدى تكونى شاربه علبه حبوب مهدئه

علبه ليه هنتحر وبعدين انا مش باخد حبوب من دى

ما هو انت مش معقول تكونى كده لوحدك     

بعدين معاك يعنى شايفانى بطوح قدامك

انا اسفه كملى

اكمل ايه هى حدوته

باين كده

انا مش هتحرك من بيتى ومن فضلك مالكيش دعوه بالموضوع ده

كده برضه وانا اللى جايه اقف جانبك

انا كويسه ومش محتاجه حد يوقف جنبى

خلاص انا ماشيه

عايده ماتزعليش انا مش ناقصه الدلع ده

حاضر طمنينى عليك انت قافله الموبيل ليه

علشان الست اللى كلمتك ماتكلمنيش تانى

هى كلمتك

ايوه وبعتت لى صورته مع العروسه

ودى مين دى اللى كلمتنا

العروسه

وقصدها ايه من كده

قصدها انى اتجنن واتصرف زى ما انت كنت عايزه

ليه

علشان تستحوز عليه لوحدها

فعلا تصدقى معاك حق علشان كده كلمت الولاد ده احمد ابنك هيتجنن

انا هتصرف مع ولادى والمجنون هعقله

طيب اقعد ولا اروح

روحى عايزه اكلمهم لوحدى لكن هقول لهم انك عزماهم على العشا وامسكى فيهم يباتوا

وماله اهلا وسهلا ينوروا لكن ليه

علشان ابنك يخفف عنهم الصدمه و طول الليل يتكلم معاهم و يمكن

طيب  انت مش محتاجه لوجودهم معاك

لا

طيب ارجع لك انا بعد شويه

لا متشكره  انا كويسه

مش باين

ليه مالى

مفيش حاجه زى الفل هاروح انا قبل ما يوصلوا

طيب سلام

مع السلامه

جلست سميره فى الصاله عند الباب فى انتظار ابنيها احمد ثالثه طب و هشام اولى هندسه وبعد حوالى ربع ساعه دخل الأثنين فاضاءت النور وقالت

حمد لله على السلامه اهلا يا دكتور اهلا يا باشمهندس

الله يسلمك يا ماما امال فين طنط عايده

مشيت

مشيت ازى احنا اتفقنا

مش عيب يا دكتور تتفق مع خالتك على ابوك

ماما انا عايز امنعه انه يتجوز

تمنعه  وانت مالك يتجوز ولا يطلق انت دخلك ايه

داخلى انى ابنه ومن حقى يكون لى رأى

رأى  والله وعرفت تربى يا سميره رجاله اسود بصحيح هيقفوا لأبوهم ويمكن بكره يحجروا عليه

ماما احمد ما يقصدش يحجر على بابا

صحيح يا باشمهندس طيب هو ما يقصدش وانت  

أنا متلخبط و هعمل اللى حضرتك تقولى عليه

اه   يعنى ممكن تقف ضد ابوك برضه

مش عارف

هتعرف امتى يا هشام  

انت زعلانه علشان عايزين نجيب لك حقك

من مين

من بابا

هو انا قاصر مستنياك تجيب لى حقى

لا طبعا لكن لازم نقف جنبك فى المصيبه دى

مفيش مصيبه ولا اى حاجه

ماما لازم ناخد موقف

انا اخد موقف انت مالك

ماما مش معقول تطلقوا بعد العمر ده كله

ده مش شغلك

ازاى يا ماما

اسمع يا ولد انا مش عيله علشان تقول لى اعمل ايه وماأعملش ايه

ماما انا مش صغير

كبرت على يا احمد

العفو يا ماما هو ده معقول

اياك تفتح معاى او مع ابوك كلام زى ده

ماما من فصلك ممكن نتكلم بهدوء

اتفضل اتكلم يا هشام  

لا انا ولا  احمد ممكن نعمل حاجه تزعلك

امال متفق انت واخوك  مع خالتك على ايه يا بشمهندس تروح تعمل لأبوك فضيحه

فضيحه ايه يا ماما احنا عايزين ننقذه

من ايه

من الست دى اللى

ترضهالى يا احمد ترضى ان ابوك يعيش معاى متغصب وهو بيحب واحده تانيه هانت عليك كرمتى للدرجه دى

يا ماما احنا

انتوا ايه انتوا خلاص كبرتوا علينا لا بقى يفرق معاكم اب ولا ام  نسيتوا

نسينا ايه

نسيت يا احمد  ابوك تعب اد ايه لحد ما عمل منك رجل اطول منه

ازى تقولى كده

هى دى الحقيقه نسيتوا

مش ممكن ننسى فضل بابا  لكن وفضل حضرتك

ماهو اللى يقف لأبوه قدام الناس ويحاسبه ويفهمه الصح والغلط بكره يقف لأمه

احنا مش رايحين نحاسبه و لا حاجه

امال رايح ليه معزومين ولا رايحين تباركوا

لا طبعا احنا كان قصدنا نساعدك

تساعدنى تسمع كلامى مش توقف ابوك موقف زى ده  ازاى تصغره بالشكل ده

طيب خلاص مش هنروح قولى لنا نساعدك ازاى

كده عقلك بدأ يشتغل اولا ما تتكلمش معاه فى الموضوع ده ابدا مهما حصل

حاضر

احمد

خلاص يا ماما وحياتك ما هافتح بقى

هشام   

امرك يا ماما كل اللى تقولى عليه يمشى يا ست الحبايب

خالتكوا عازماك على العشا عندها وخدوا هدوم تناموا فيها

لا مش معقول نسيبك لوحدك

الكلام ليه مش هيتسمع  تانى

لا بس الظروف

انا كويسه

بجد يا ماما

طول ما كرمتى محفوظه انا بخير

ما هو لو بابا اتجوز كرمتك وكرمتنا هتبقى فى الأرض

ليه بقى يا سى احمد هو هيعمل حاجه تغضب ربنا

لا لكن فضيحه وبجلاجل كمان

احنا اللى ممكن نخليها فضيحه لو اتهورنا و اتصرفنا بعبط

ولو اتصرفنا بعقل يا ماما بابا هيرجع لنا

هشام ماحدش ممكن ياخد ابوك منك يا حبيبى حتى لو اتجوز هيفضل ابوك اللى بيحبك لكن انت ممكن تخليه يبعد عنك لو غلطت فيه هتعمل بينك وبينه شرخ كبير وهتغضب ربنا ومش هترضينى

طيب ولو ماغلطش

يبقى هيفضل الوضع زى ما كان طول عمره

يعنى هو هيرجع البيت

طبعا مش بيته لكن عارفين لو رحنا هيحصل ايه

ايه اللى هيحصل

هى هتعرف اننا عرفنا ويبقى من حقها تطلب من بابا يقسم الوقت بينا وبينها لكن دلوقتى هو هيقعد معاها ساعه ولا ساعتين فى اليوم والباقى معانا

المهم حضرتك تفضلى على ذمته

انت عايز ايه يا احمد

مش عايزكوا تطلقوا

حاضر لو ما فتحتش الموضوع ده تانى مش هنطلق

حتى لو اتجوز

حاضر يا احمد خلاص

ماما ممكن ماتزعليش  منى

ممكن طبعا انا مقدره صدمتك والمجرمه اللى كلمتك طيرت عقلك لكن اتعود ماحدش يمشيك  فكر الأول قبل ما تتصرف وبعدين  مش يمكن الكلام ده كله كذب

ياريت يا ماما بس دى بعتت صوره بابا وهو معاها فى  مكان غريب كده

ما سمعتش عن حاجه اسمها تركيب الصور

سمعت طبعا تفتكرى

مش عارفه لكنه احتمال عموما هافترض ان الموضوع حقيقى لازم مانتهورش وما نزعلش بابا مننا

صح  يا ماما معاك حق

هشام سوق انت العربيه احمد اعصابه تعبانه

انا كويس يا ماما طول ما حضرتك كويسه وراضيه عنى

الحمد لله انا كويسه اوى وراضيه عنك وعن اخوك  ربنا يخليكوا لى

 ماما بس عايز افضل معاك

لا يا حبيبى  انا عايزه اقعد مع نفسى شويه

طيب ممكن تفتحى الموبيل علشان اطمن عليك كل شويه

حاضر ياله مايصحش تتاخروا على خالتكوا 

فتحت سميره الموبيل وجلست فى البلكونه تستمع لعبد الوهاب واطمئنت على اولادها عده مرات كانت تشعر ان زوجها لن يخذلها وان مصطفى ليس الرجل الذى يضحى ببيته من اجل نزوه خاصه وهو متأكد انها لن تقبل زواجه بأخرى  واغلب الظن ان الفتاه تصرفت هكذا فى لحظه يأس  وعند منتصف الليل احست بيده تمتد الى كتفها و قال  

ممكن اتعشى ولا المضبخ شطب

نفتحه علشان خطرك تحب تاكل ايه

اى حاجه من ايديك تبقى شهد مكرر

حاضر

تسلمى يا حبيبتى انا جايب كباب من المحل اللى بتحبيه

طيب هحضر السفره

لا كل حاجه جاهزه اتفضلى يا مليكتى

ملكه مره وحده

طبعا على الأقل على عرش قلبى ولا ده مش كفايه

لا ازى كفايه اوى  ده يساوى الدنيا كلها  

الولاد فين

عند خالتهم  تحب اكلمهم

لا خليهم هناك وهما كويسين

الحمد لله انت مش شفتهم الصبح

ايوه بس كان رد فعلهم ازاى لما كلمتهم ال

البنت اللى قالت لهم انك  اتجوزت

انا ماتجوزتش

ليه مش كان الليله برضه

ايوه بس اكتشفت انى مقدرش اتجوز غيرك

ليه سحره لك ولا عمله لك عمل

اكتر من السحر والأعمال انا بحبك

مرسى

هو انا بعزم عليك بشكولاته

لا بتجاملنى

انت بتشكى فى حبى ليك

الحب مش كلام يا مصطفى

انا عمرى ماعملت حاجه تضايقك او تجرحك والناس كلها بتحسدنا على سعادتنا

ده صحيح لكن ده مش بدافع الحب

مفيش حاجه تجبرنى على كده

لا فيه الرغبه فى الأستقرار و الأحتياج

الأستقرار ماشى لكن انا محتاج لك فى ايه بقى انا عمرى مااخدت قرش من ماهيتك

فى الأول كنت محتاج واحده تثق فيها وتطمن معاها على اسمك وسمعتك وبيتك

طيب ما كان فيه بنات كتير كده

مش كتير ولا حاجه

انا طبعا كنت عايز اتجوز واحده محترمه وتقدر قيمه الشرف وده مش عيب

لا مش عيب بس مش حب لان الحب مافهوش اختيار

يعنى كنت عايزانى اتجوز اى واحده من الشارع والا ابقى ماعرفش احب

لا طبعا انت علشان كده متجوزتش الليله رغم انك تعرفها من شهور

هى قالت لك ايه الكذابه دى

انا قفلت السكه مخلتهاش تتكلم  لكن كنت حاسه طبعا

وسكتى ليه

علشان احافظ على كرمتى وكرمتك قدام  ولادنا علشان يعيشوا رفعين راسهم مش مكسورين

بنت ال...... قالت لى انها كلمتهم

ايوه  وانا صلحت كل شئ ومش هيتكلموا معاك فى حاجه ياريت تقول لهم انك هنا و ان دى مؤمره حقيره من واحده شريره او مقلب من واحد بينافسك فى الشغل  أو اى حاجه

وهيصدقوا

ايوه  طبعا علشان عايزين يصدقوا

حاضر  ذهب مصطفى واتصل باولاده و عاد اليها

صدقوا يا مصطفى صح

ايوه وفرحوا اوى  واعتذروا لى لانهم اساءوا الظن بى

يا بختهم

والله انا بحبك اوى

مصطفى انا مش عيله هتضحك على بكلمتين

انا عارفه انا ايه بالنسبه لك وراضيه

طيب انت ايه اوعى تقولى ام العيال ده احنا حبنا بعض سنين طويله

الحب قبل الجواز مختلف عن بعد الجواز بس انا عارفه انى بالنسبه لك اكتر من كده وبكتير كمان

اكتر من الزوحه وام العيال الحبيبه

لا فيه الصاحب  هى عشره العمر ده كله مش مصاحبه

كنت احلى عشره بس ده مايمنعش انى بحبك والله بحبك

دلوقتى ولا قبل كده

طول عمرى بحبك

واللى حصل خلانى اتأكدت زياده و اخترتك انت

مش يمكن علشان ولادك

ولما كنت هتجوزها ماكنش عندى ولاد

لا بس كنت تحت تاثيرها

 ده حقيقى لا تتخيلى انا اتعرضت لغوايه شكلها ازاى

ماحدش بيضرب حد على ايده

معاكى حق بس برضه الشيطان شاطر

الشيطان بيتشطر على الناس اللى عايزه تسمع كلامه

مش هقول لك لا بس فى الأخر انا اخترتك

سبتها ليه مع انها حلوه وصغيره

بحبك

مش هقول لك مرسى علشان متزعلش لكن

انا هحكيلك على كل حاجه

انا عرفتها من ست شهور كانت مديره مكتب حامد زميلى ولما نهله مديره مكتبى اخدت اجازه جواز حلت محلها مؤقتا ولما رجعت من الأجازه  طلبت منى اكلم حامد علشان تكمل هى مديره لمكتبى بدل نهله لانها ارتاحت فى الشغل معاى فرحت وعاجبنى انها معجبه بى لكن والله عمرى ما عملت معاها حاجه تغضب ربنا او تجرح كرمتك او

لكن كانت عاجباك

هى حلوه لكن مش هو ده اللى لفت نظرى انا مافكرتش فيها غير لما صارحتنى انها بتحبنى ونفسها تتجوزنى وماعندهاش مانع نتجوز فى السر علشان متهدمش بيتى

ياه هى اللى طلبت تتجوزك

ايوه

وبعدين

عملت عنها شويه تحريات لقيت ان مستواها الأجتماعى والمادى مش قوى وان كانت بتتظاهر بغير كده وكمان فى بعض التحفظات على اخلاقها لكن كان التراجع محتاج خطه رسمتها و نفذتها

ازاى

ماكنش ينفع اقول لها انى مش هتجوزها لكن قررت ابعد بالتدريج عملت حركه تنقلات وبعدتها عن مكتبى وقلت لها علشان كلام الموظفين و مفيش لازمه تفضل  معايا فى المكتب لما نتجوز هتبقى معايا فى البيت   وبعدين قلت لها انى هكتب عقد الشقه المفروشه باسمها طبعا هى اتجننت لما عرفت اننا هنتجوز فى شقه مفروشه مش تمليك  المره اللى بعدها قلت لها هنكتب عقد عرفى وفقت بشرط اكتب لها شيك بخمسين الف جنيه بدل عفش

ياه دى متوضعه اوى

قلت لها طيب و فوجئت انها جايبه ابوها اليوم اللى بعده علشان تعرفنى بيه وحدد ميعاد الجواز الليله علشان سمعه بنته وكلام الناس وافقت علشان انهى الموضوع وهناك اتخنقت معاهم علشان قلت لى انا ماتجوزش على ضره  قلت لها و انا مش همضى على ورق ولا شيكات فقالت لى انها حست انى غدرت بيها فكلمتك وكلمت الولاد وعملت فضيحه وروح استلقى وعدك

يعنى لو كانت طلعت كويسه كنت اتجوزتها

ماعتقدش لكن انت لما كلمتك عملت ايه

ولا حاجه اتضيقتك طبعا لكن قلت لنفسى العيشه مش بالعافيه

طول عمرك عاقله يا سمسمه

يمكن الحاجه اللى عملت لى توازن انى عارفه  انك عاقل ومش ممكن تجرحنى حتى لو كرهتنى

اما مش ممكن اكرهك ابدا لكن انت كرهتينى لما كلمتك

انا ماعرفش اكره بس فى حاجه انكسرت جواى

هنصلحها مع بعض

تفتكر ممكن

جربى ومش هتندمى