سنوات ليست من العمر

سنوات ليست من العمر

       الفصل العشرين

لم تفكر شرين فى طريقه طبيعيه يتم بها التعارف بين خالها و سامى كما اقترحت هند لانها كانت تفكر فى شئ اهم هل تتزوجه ام تنهى هذا الأمر تماما و لم تستطيع ان تصل لقرار لقله مقابلاتهما ولكنها فى كل مره كانت تشعر انه محبط وان وجودها فى حياته جعله متوازن نفسيا الى حد كبير وانها لا يمكن ان تتركه وهو فى هذه الظروف وكانت تشعر انه يحبها بصدق وهى ايضا تعلقت به فقررت تأجيل التفكير فى الموضوع حتى تنتهى الأجازه وانشغلت مع والدتها لانها كانت قلقه بسبب اقتراب موعد عقد قران خالها واصرار العروس ان يعقد الشبخ عمر شحاته القران بنفسه وكانت ترى ان هذا يعنى ان العروس لها افكار دينيه سلفيه وهذا يختلف تماما عن طريقه خالها فى التفكير وكانت شرين لاترى داعى لهذا القلق وتقول لها

يا ماما خالى عاوز واحده متدينه ومحجبه علشان يقدر يثق فيها

ايوه بس ده شئ والعشره شئ تانى

مش فاهمه

يا بنتى عروسه خالك صغيره وحلوه ومتدينه وخبرتها فى الحياه قليله جدا

دى ميزات مش عيوب

ميزات ليها مش لخالك

ازى بقى ده خالى كل ما كان يشوف واحده سنها مناسب كان يقول متجوزتش لحد دلوقتى ليه لازم فيها عيب واحنا مش شايفينه

ايوه بس ده سبب  للجواز مش لأستمرار السعاده بينهم

تقصدى انهم مش هيكون بينهم تفاهم

تمام كده وكمان حاسه انها هتتجوزه وهى حاطه فى دماغها انها تقدر تغيره

تغيره  من ناحيه الدين مش كده تهديه

ايوه هى علشان صغيره فاهمه ان ده ممكن

وده مش ممكن

اولا محدش بيتغير الا لو هو عاوز يتغير

طبعا لكن مش ممكن يتغير علشان واحده بيحبها

لا

ازى

معنى ان الواحد يتغير يعنى يشوف نفسه غلط وهى صح

وده مش صحيح

لا

لا ازى هى متدينه اكتر منه بكتير

لا هى متدينه بطريقه تانيه

وهو التدين فيه طرق

انا هاقول لك حاجه الصلاه مثلا فى واحد لو صلى الفروض كلها يعتبر ان كده هو عمل اللى عليه

زى خالى

مثلا وفى واحد لو صلى السنن بس يبقى حاسس انه مقصر

زى العروسه

طيب وهى دى مشكله

المشكله ان كل واحد هيشوف التانى غلطان هى شايفاه مقصر ومش متدين وهو هيشفها متعصبه ومحبكاها وده هيخلق مشاكل كتير

طيب بس بعد شويه كل واحد هيفهم التانى وننتهى

لا المشكله هتزيد و هتكبر خصوصا ان خالك اكبر منها بكتير وخبرته فى الحياه اكتر و الكتب اللى قراها تعمل مكتبات وكمان عاش بره فتره وسافر اكتر من بلد

بس خالى صحيح سافر اوربا كتير لكن ماعاش هناك اكتر من تلات اشهر

اقصد انه شاف بنات اوربيات وتعامل معاهم وفى حاجات كتير عجبيته فى تفكيرهم

وماتجوزش واحده منهم ليه

علشان مش كل حاجه تعجبك تقدرى تعمليها

ازى

يعنى لو فيه فستان عجبك بس عريان خالص هتلبسيه

لا طبعا

مهما ان كان حلو

مش هلبسه حتى لو احلى فستان فى الدنيا

هى نفس الحكايه

هو الجواز  زى الفساتين

مش كل واحده تعجبه ممكن يتجوزها ويطمن لها

تقصدى ان فيه واحده يحبها وواحده يتجوزها

مش بالصوره دى لكن الجواز لازم علشان يكون سعيد يكون فى اتفاق فى الأهداف

اهداف  يعنى ايه

يعنى كل واحد لازم يحقق للطرف التانى اللى هو عاوزه وده مش هيحصل

ليه مش هو عاوز واحده يطمن لها و هى فى نفس الوقت حلوه ولطيفه جدا ومهذبه و جامعيه عاوز ايه تانى

عاوز واحده تشاركه اهتمامته خالك غاوى سينما واغانى وكتب و مطاعم وسفر

وهى مش كده

مش بيتهيألى هى غاويه دروس دين واجتماعيه عنه كتير و مش بتحب السينما ولا الأدب قريتها فى الدين بس وكمان مش فى كل الأتجاهات الدينيه زى خالك لكن فى الكتب السلفيه بس وبتحب اكل البيت

طيب مش ممكن واحد فيهم هيتغير

صعب

يعنى مفيش حد بيتغير علشان حد

نادر جدا

لما يكون بيحبه اوى

مس الحب بس لكن الأستعداد للتغير هو ده المهم

طيب ما تقولها تقوم تاخد بالها

ما ينفعش هتفتكر انى مش عاوزاها تتجوز اخويا

طيب  خالتى تقولها

اشمعنى خالتك

علشان محجبه زيها

خالتك مش شايفه ان دى مشكله

ماما هو الأختلاف ده اللى خلى ماجى ادمنت الخمره

ماجى بتاعه فالكن كريست

ايوه

ماجى فى المسلسل بتمثل الخير ومعانتها جت من الصراع بين الحب والضمير

يعنى الناس بتدمن الخمور و المخدرات علشان ضميرها مش مستريح

مش بالبساطه دى فى اسباب كتير

زى ايه

لو طبعا بعدنا عن المخدرات القويه اللى بتدمن من مره ومرتين ممكن يكون السبب الأحباط او عدم الرضا عن الذات وممكن يكون شايف ان ده المتعه الوحيده اللى فى حياته

المخدر

او الخمره

ازى

فيه بعض الفئات وجود الخمره فى البيت شئ طبيعى لكن بيشربوها بقدر معقول

فعلا زى الأوربين

وفى فئات تانيه تعاطى المخدرات عندهم شئ مقبول واحيانا محبب

محبب

طبعا يعنى هى دى الرجوله من وجهه نظرهم او لازوم الفرفشه احيانا بعض الناس دول فى ظروف معينه الأمور بتزيد عن الحد المعقول و بيدمنوا الخمور والمخدرات زى ماجى كده

دول يبقى صعب علاجهم

لا دول مستحيل علاجهم الا لو اتغيرت طريقه تفكيرهم

يعنى يحصل وعى

طبعا

وعى دينى

دينى وثقافى واجتماعى وصحى

وكل ده مين يعمله

كل الناس اللى تقدر تعمل كده

زى مين

المثقفين والأباء و الأمهات والمدرسين والدكاتره والصيادله واساتده الجامعه والممرضات والصحفيين والممثلين والعمال اللى متنورين  على رأس كل دول رجال الدين اللى لهم شعبيه كل واحد فى مجاله ممكن يحارب الكارثه  

هى قضيه قوميه

طبعا

بس المدمن مش بيضر حد غيره

ده بيتهياله كده

ازى

اولا لازم تعرفى ان كل واحد فى الدنيا لما بيتولد بيحتاج رعايه خرافيه لحد ما بيكبر  

طبعا رعايه من امه وابوه

ايوه الأم والأب رعايتهم ضروريه لكن بيحتاج  كمان تعليم و علاج و شوارع منوره و اكل واتوبيسات يركبها و ادويه وحمايه داخليه و خارجيه وفرص عمل وحاجات كتير مين بيوفرله كل ده

الحكومه

لا المجتمع كله مش الحكومه بس الدكتور اللى بيعالجه و الفلاح اللى بيزرع والسواق اللى بيسوق الأوتوبيس و العسكرى اللى واقف يحرس البيوت والمحلات وغيرهم كل دول بيخدموه

ومن حقهم انه يكون له دور فى خدمتهم

ماهم بياخدوا اجر على اعمالهم

لكن بيخدموه احيانا بيموتوا وهما بيخدموه

زى الضباط والعساكر فى الجيش والبوليس

هم وغيرهم مايكنش جزاتهم انه  يتعاون مع اعداءهم

اعداءهم تجار المخدرات

والمهربين والدول اللى عاوزه تخرب العالم وتحكمه عن طريق المخدرات

معقول الموضوع كبير كده

طبعا

بس الدول دى فيها مدمنين

ما هو طباخ السم بيدوقه وربنا بيوريهم فى شبابهم اللى بيعملوه فى الناس

وهم مش فارق معاهم ولادهم

لا اهم حاجه انهم  يحققوا اهدفهم

ياستار يارب فيه ناس كده

مع الأسف فيه وهم  اللى ربنا قال لنا نستعيذ منهم فى سوره الناس  (من شر الوسواس الخناس من الجنه والناس ) يعنى دول شياطين بس من الناس اعوز بالله  ماما طيب ليه ريتسارد متغيرش علشان بيحب ماجى

لان التغير مش سهل كده زى ما انت فاهمه

التغير يعنى مش هيكسب زى ماكان بيكسب يعنى هيقطع علاقته بناس مجرمين ممكن يقتلوه

يقتلوه هى الدنيا سايبه

مش مافيا

يعنى من ليس معى فهو على

ده مبدأ ناس كتير مش المافيا بس ممكن السياسيين المرتشين بعض تجار السلاح او الدعاره او المخدرات

والتغير كمان معناه انه يستغنى عن رجالته اللى بيحموه

ليه

لانهم اصلا اشرار

مش ممكن بالتدريج

لو كان عنده استعداد يتحمل الخساره

وبعدين الخير والتوبه سكتها مش سهله

ليه

لان الشر متشابك وبيحمى بعضه

يعنى مستحيل حد يتوب

مفيش مستحيل لو فيه نيه صادقه ورفض داخلى حقيقى للشر

طيب وماجى

جرالك ايه يا شرين كأن ماجى دى من بقيه عليتنا

لا بس انا بحبها

هكلم المخرج يخليها تبطل خمره

يا ماما بجد بقى

بجد ازى فى حاجه مش بجد

يعنى هى او اللى زيها ممكن يتعلجوا

ممكن لو عرفوا يحددوا هما عاوزين ايه

يعنى لازم الواحد يختار بين الحب والضمير

وهو لازم الواحد يحب واحد مجرم

وهو ريتشارد  مجرم

على الأقل انسان مش شريف

وهو الواحد بيحب بمزاجه مش القلب وما يريد

صحيح الواحد ما يمكلش عواطفه لكن يملك تصرفاته و يملك انه يبعد عن الشخص ده

وليه ما يغيروش للأحسن

الأحسن بالنسبه لمين

يعنى ايه

يعنى كل واحد شايف الأحسن من وجهه نظره

مش فيه حاجات عامه

قليله اوى

وحتى الحاجات دى كل واحد بيفسرها بطريقته

بس فيه حاجات ثابته

طبعا فيه لكن اهميتها عند كل واحد بتختلف

ازى

احنا كمسلمين مثلا عندنا فروض لازم نعملها هل بنعملها زى بعض

لا بنختلف من شخص للتانى فى واحد بهتم بتنفذها بدقه وواحد مش بيعملها  خالص واغلب الناس فى النص

فعلا

بس الصح ان الواحد ينفذها بدقه

ايوه بس مش شرط ان اللى بينفذها بدقه تكون اخلاقه كويسه

يبقى الأخلاق اهم

مش اهم كل واحد عنده حاجات بينه وبين ربنا مهمه بالنسبه له وشايف ان ده الصح

يعنى ايه

فى واحد شايف ان اهم حاجه هى الصدق وواحد شايف انها الصلاه وواحد يقول الأمانه

كل دى حاجات كويسه 

علشان كده مفيش مقياس واحد يصلح لكل الناس

معنى كده ان مفيش مقياس خالص

علشان كده ربنا هو اللى بيحاسب مش الناس

صح كده لان هو اللى عارف كل واحد نيته ايه وعلاقته بيه شكلها ايه

هو ده العدل

 قول لى صحيح هتلبسى ايه فى كتب الكتاب

الفستان الجديد

ده بالليل وساعه الصلاه

هلبسه برضه

هتصلى الجمعه بفستان قصير و نص كم

طيب هعمل ايه

شوفى بلوزه بكم

صيفى معنديش

طيب اشترى واحده

اشترى واحده علشان البسها ساعه وخلاص

طيب البسى البلوزه البيضا والبسى شراب

يا ماما دى زى قميص المدرسه

اخترى حل من الأتنين يا تلبسيها يا تشترى                     

وشراب كمان فى الحر ده

عندك حاجه ماكسى

لا

خلاص لازم تلبسى شراب

حاضر بس مش اسود

طيب

هو لازم بعد صلاه الجمعه ما بعد العشا يكون الجو اتحسن

وقت كتب كتابك اعملى اللى انت عاوزه

الأمر لله

اهوده زى اللى كنا بنقوله انت عارفه انك لازم تبقى محجبه

ايوه بس الأخلاق اهم

ده رأيك انت  مش رأى كل الناس فيه ناس شايفه ان الحجاب اهم حاجه فى الدنيا

معاك حق فى ناس شايفه كده

هروح اطلع البلوزه البيضا علشان تتكوى